Advertisement
Lennim Jobs
ஹூஸ்டன் என்ஆர்ஜி அரங்கில்பிரதமர் மோடி சொற்பொழிவு: சர்வதேச வல்லுநர்கள் பாராட்டு.

23-09-2019

ஹூஸ்டன் என்ஆர்ஜி அரங்கில்பிரதமர் மோடி சொற்பொழிவு: சர்வதேச வல்லுநர்கள் பாராட்டு.

23-09-2019

ஹூஸ்டன் என்ஆர்ஜி அரங்கில் திரண்டிருந்தவர்களுக்கு மட்டுமல்ல, அதிபர் டிரம்புக்கும் அமெரிக்காவின் ஜனநாயகக் கட்சியினருக்கும், அமெரிக்க வாழ் இந்தியர்களுக்கும், இந்திய மக்களுக்கும் பாகிஸ்தானுக்கும் ஒட்டு மொத்த  உலகிற்குமே பிரதமர் மோடி  உரையாற்றினார் என்பதுதான் அவரது ஹூஸ்டன் உரையின் தனிச்சிறப்பு என வல்லுநர்கள் பாராட்டுகின்றனர்.

வெளிநாடு வாழ் இந்தியர்கள் மத்தியில் பிரதமர் மோடி உரையாற்றுவது புதிதல்ல என்றபோதிலும், ஹூஸ்டன் உரை நிகழ்த்தப்பட்ட காலகட்டம் என்பது மிக முக்கியமானது. ஜம்மு-காஷ்மீருக்கு சிறப்பு அந்தஸ்தை ரத்து செய்துள்ள அதேநேரம், அதை சர்வதேச பிரச்சனையாக்க முயற்சி செய்யும் பாகிஸ்தானின் முயற்சிகளை முறியடித்தாக வேண்டும், அமெரிக்காவின் நம்பிக்கையை வென்றாக வேண்டும் என்ற நிலையில் இந்த உரை நிகழ்த்தப்பட்டுள்ளது.

வர்த்தக விவகாரத்தில் இந்தியா-அமெரிக்கா இடையே உரசல்கள் எழுந்துள்ள நேரத்திலும், காஷ்மீர் விவகாரத்தில் மேற்கத்திய ஊடகங்களில் தவறான சித்தரிப்புகள் எழும் நேரத்திலும், உலக அளவிலும் இந்தியாவிலும் பொருளாதார வளர்ச்சி குறித்த கவலைகள் நிலவும் நேரத்திலும் இந்த உரையை பிரதமர் ஆற்றியுள்ளார். அதுமட்டுமல்ல, 50 ஆயிரம் பேர் திரண்ட கூட்டத்தில் இந்தியப் பிரதமருடன், அமெரிக்க அதிபரும் பங்கேற்றார் என்பது, இதுவரை இல்லாத ஒரு வரலாறு என்பது ஹூஸ்டன் உரையின் முக்கியத்துவத்தை அதிகரிக்கச் செய்துள்ளது.

ஆப்கானிஸ்தானில் தலையீடு, காஷ்மீர் விவகாரத்தில் அமெரிக்காவின் ஆதரவைப் பெற முயற்சி என பாகிஸ்தான் கடும் முயற்சிகளை மேற்கொள்ளும் இந்த நேரத்தில், அமெரிக்காவுடனான சுமூக உறவு என்பது மிகவும் அவசியமாகும். ஜம்மு-காஷ்மீருக்கு அரசமைப்புச் சட்டத்தில் வழங்கப்பட்டிருந்த சிறப்பு அந்தஸ்து ரத்து மற்றும் அங்கு விதிக்கப்பட்ட கட்டுப்பாடுகளை காட்டி, அமெரிக்கா உள்ளிட்ட மேற்கத்திய நாடுகளின் ஆதரவைப் பெற முடியும் என பாகிஸ்தான் கருதும் வேளையில், அந்த முயற்சிகளை தடுத்தாக வேண்டும்.

இதை மனதில் கொண்டும், டிரம்பின் தற்பெருமிதம் மிக்க ஆளுமை ஒருபுறம் இருந்தபோதிலும், அடுத்த அதிபர் தேர்தலில் வென்றாக வேண்டும் என்ற அவரது கணக்கீடுகளையும் மனதில் கொண்டே மோடியின் பேச்சு இருந்தது என வல்லுநர்கள் சுட்டிக்காட்டுகின்றனர். டிரம்பின் தலைமை, அமெரிக்க பொருளாதாரத்தை வளர்த்தெடுக்கும் அவரது முயற்சிகள், ஒப்பந்தங்களுக்கு இணங்கச் செய்யும் திறமை, அமெரிக்காவின் வளர்ச்சிக்கு அவர் உறுதிபூண்டிருப்பது என்ற அம்சங்களை குறிப்பிட்டு மோடி பாராட்டியதும் அதனால்தான். சுருக்கமாக சொன்னால் டிரம்பை இந்தியாவின் வசப்படுத்தும்  முயற்சியில் மோடி வெற்றி பெற்றுள்ளார் என்றே அரசியல் நோக்கர்கள் கருதுகின்றனர்.

தீவிரவாதத்திற்கு எதிரான போரை மையப்படுத்தி பாகிஸ்தானை தனிமைப்படுத்துவது, ஜனநாயகம், கலாச்சார பன்முகத்தன்மையின் அடிப்படையில் இந்தியா தொடர்ந்து கட்டியெழுப்பப்படும் என்பதை உறுதிப்படுத்துவது, இதுவே இரு நாடுகளையும் பிணைக்கும் அம்சம் என்பதை அமெரிக்காவின் ஜனநாயகக் கட்சியினருக்கும் உணர்த்துவது, பொருளாதார சீர்திருத்தங்களிலும் நவீனமயமாக்கத்திலும் இந்தியா உறுதியாக இருப்பதை உலக தொழில்-வர்த்தக சமூகத்தினருக்கு உணர்த்துவது ஆகியவற்றை இலக்குகளாக கொண்டு மோடியின் ஹூஸ்டன் உரை அமைந்திருந்தது.

இதேபோல அமெரிக்க வாழ் இந்தியர்களையும் இலக்காக கொண்டு அமைந்திருந்த மோடியின் உரை அவர்களது முக்கியத்துவத்தை உணர்த்தியிருப்பதோடு, அமெரிக்காவில் செல்வாக்குமிக்க சமூகமாக அவர்கள் தங்களை அடையாளம் காணவும் உதவியிருக்கிறது. அந்த வகையில் அமெரிக்க வாழ் இந்தியர்களுக்கும் மோடி உத்வேகம் அளித்திருக்கிறார். இறுதியாக, ஹூஸ்டன் சொற்பொழிவு மூலம் இந்திய மக்களுக்கும் மோடி உரையாற்றியிருக்கிறார்.

அமெரிக்க அதிபர் டிரம்புடன் ஒரே மேடையில் தோன்றி, உலக அரங்கில் இந்தியா தனக்குரிய முக்கியத்துவத்துவம் பெற்று முத்திரை பதித்திருப்பதை   இந்திய மக்களுக்கு அவர் உணர்த்தியிருக்கிறார். ஹூஸ்டன் உரைமூலம் ராஜதந்திர வெற்றிக் கொடி நாட்டியிருக்கிறார் மோடி என்பதே சர்வதேச பார்வையாளர்களின் கருத்தாக உள்ளது. 

.